America kaburlu-5

 అమెరికా కబుర్లు -5

ఈ రోజు Rock Creek Park కి వెళ్ళాము. ఇది చాలా పెద్ద పార్క్ . పార్క్ అనేకంటే చిన్న అడవి. ఊరి మధ్యలో వుంది . పెద్ద చెట్లు , చిన్న సెలయేరు , రోడ్డు . నడవడానికి చాలా బాగుంది . మాలాగానే ఎంతో మంది పిల్లలు , పెద్దలు వచ్చారు. నడిచే వాళ్ళు , సైకిల్ తొక్కేవాళ్ళు , జాగింగ్ చేసే వాళ్ళు .

ఈ జాగింగ్ గురించి తమాషా విషయం చెప్పాడు మా అబ్బాయి . అమెరికాలో ఏ సమయం లో చూసినా ఎవరో ఒకరు జాగ్ చేస్తూ కనిపిస్తారుట. అది అర్ధరాత్రి అయినా , తెల్లవారు జామైనా , మిట్ట మధ్యాహ్నమైనా , చలైనా , వానైనా , ఎండైనా జాగ్ చేస్తూ వుంటారుట. సోమవారం పొద్దున్న కూడా కనపడతారు - అసలు వీళ్ళకి ఆఫిసులు , పని వుంటుందో వుండదో అర్ధం కాదు అని .

ఎందుకలా అంటే హెల్త్ కానష్సనెస్ ట. తినేటప్పుడు కన్వీనియన్స్ , తరువాత జాగింగ్ .. ఏమిటో !

సరే - రాక్ క్రీక్ పార్కు దాదాపు 1800 ఎకరాల పార్క్ ట . నడవడం చాలా హాయిగా వుంది . ఎంత పెద్ద చెట్లో ! ఏదైనా ఇలా వూరి మధ్యలో ఇలా పచ్చదనం వుండడం , అవి వూరికి ఆక్సిజన్ ఐలెండ్స్ లా పని చేస్తాయి. ప్రశాంతంగా పిట్టల కూతలు వింటూ నడవవచ్చు .

మధ్యాహ్నం 2.00 కి వాన వస్తుందని హడావిడిగా వచ్చాం. ఖచ్చితంగా 2.00 కాగానే వాన వచ్చింది ' ఓరినీ ! అమెరికా వాడు వానని కూడా టైం ప్రకారం రమ్మంటాడే ! '. మనూళ్ళో వెదర్ రిపోర్టు వాన అంటే ఎండ కాస్తుంది . ఈ మధ్య నయమే ! అయితే ధండర్ స్ట్రాం అన్నాడు కాని ఒక అరగంట కురిసి ఆగి పోయింది. నేను హమ్మయ్య అనుకున్నాను . వాన ఆగినందుకు కాదు, అమెరికా వాడు చెప్పినట్లు జరగనందుకు.

America kaburlu-4

 అమెరికా కబుర్లు -4

కిందటి సారి మిస్ అయిన వాటిలో ఇది ఒకటి. వాటర్ ఫ్రంట్ పార్క్.

ఊబర్ తీసుకుని బయలుదేరాము. ఆ డ్రైవరు ఏ దేశస్ధుడో , ఎక్కిన దగ్గర నుంచి మాట్లాడుతూనే వున్నాడు - మాతో కాదు - ఫోన్లో. అయితే మెల్లగా . మన దేశంలోలా గట్టిగా మాట్లాడడం లేదు.

పొటోమాక్ west virginia లో పుట్టి మధ్య లో ఎన్నొ నగరాలు దాటుకుంటు వాషింగ్టన్ డి.సి . మీదుగా ముందుకు వెళ్తుంది . మన నదులు బట్టి చూస్తే చిన్న కాలవ లా ఉంది . అంటే ఈ ఊళ్ళో అలా ఉండి ఉండవచ్చు . ఇంతకు ముందు ఆ పరివాహక ప్రాంతం కి అటు ఇటు సిమెంట్ తో కాంక్రీట్ చేసేసారుట . తరువాత పాలకులకు తెలివి వచ్చి ఆ సిమెంట్ అక్కడక్కడ వుంచి మిగతా అంతా చెట్లూ , మొక్కలు , గడ్డి పెంచారు . కూచోడానికి బెంచీలు వున్నాయి . ఈ రోజు రంజాన్ కనుక పిల్లలు తీసుకుని , చక్కగా ముస్తాబై వచ్చారు . గ్రీన్ టీ , టపియోకా , లిచ్చి ల తో చల్లటి టీ తీసుకుని అక్కడకి చేరుకున్నాము . అందులో బోట్ రైడింగ్ కూడా వుంది . మేము వెళ్ళి నప్పుడు కొంత మంది అమ్మాయిలు మన కేరళ బోట్ rowing లాంటి దానికి ట్రైన్ అవుతున్నారు . అలా రెండు గ్రూపులు వున్నాయి . కాసేపు కూర్చుని , అటు నుంచి నడుచుకుంటూ వెళ్ళి కాస్త షాపింగ్ , సరుకులు కొనుక్కుని బయలుదేరాము. ఏ దేశమైనా ఇవి తప్పవు .

దారిలో మయన్మార్ విషయమై ఆ దేశస్థులనుకుంటాను ఏవో స్లోగన్లు అరుస్తూ నిల్చున్నారు . పాపం వారి భయం తల్చుకుంటే బాధ అనిపించింది . పవర్ , రాజకీయం -- ఈ రెండు ఎంత భయంకరమైనవి !!

అక్కడ ఒక ఆకు పచ్చ సైకిల్ చైన్ వేసి వుంది . మా అబ్బాయి దాన్ని చూపి ' దీని అర్థం ఇక్కడ ఒకరు సైకిల్ మీద వస్తూ ఉంటే ఆక్సిడెంట్ అయ్యి చని పోయాడని గుర్తు . ' ఈ వూరు సైకిల్ తొక్కే వారికి ఫ్రెండ్లీ గా ఉండదుట . ఎన్నో దుర్మరణాలు . అందుకే కొంత మంది ఈ విధం గా తమ నిరసన తెలియజేస్తున్నారుట .

మా అబ్బాయి మొదట్లొ ఆఫిస్ కి సైకిల్ మీద వెళ్ళేవాడు . ఆ రోడ్డు కూడా చాలా బిజి రోడ్డు . ఇప్పుడు తల్చుకుంటే భయం వేసింది . ఇప్పుడు మెట్రోనే !

ప్రతి దేశం లోనూ ఏవో మంచి చెడు . రోడ్లు ఖాలిగా వుంటాయి . కార్లు పద్ధతిగా నడుపుతారు అనుకుంటూ వుంటే భయ్యిమని చప్పుడు చేసుకుంటూ కారు దూసుకు పోతు కనిపించింది . ఇట్టాంటి వారు ఏ దేశం లోనైనా ఒకటే ! ' అందరూ మమ్మల్ని చూడండహో ! నా కారు గొప్పది ! నేను యంగ్ ! నేను స్పీడు గా పోగలను !'

ఇదీ మెస్సేజ్ . నవ్వుకుని , జాలి పడడమే -- వాడు అమెరికన్ అయినా , ఇండియన్ అయినా ! ఏమంటారు ?

అన్నట్లు పొటొమాక్ దగ్గర పిచుకలు కనిపించాయి . మన దేశివాళి లా వున్నాయి . ఇక్కడా అవేనా ? లేక మన దేశం నుంచి పారిపోయి ఇవీ ఇక్కడకు వచ్చాయా ? లేక వీళ్ళేమైనా ఎత్తుకు వచ్చారా ? ఏమైనా చెయ్యగలరు ---అమెరికన్లు కదా !

America kaburlu-3

 అమెరికా కబుర్లు -3

రొటీన్ నెమ్మదిగా నడుస్తోంది . నేను ఒంటరిగా వెళ్ళడానికి మంచి ప్రదేశాలు ఆలోచించి " అమ్మా, ఇక్కడకి దగ్గర్లోనే ఒక మంచి పుస్తకాల షాపు వుంది, వెళతావా ? " అని అడిగాడు . ఎగిరి గంతేసాను ( నిజంగా కాదండోయి) .

మా ఇంటి నుంచి ఇరవై నిమిషాల నడక. ఫోన్ లో జి.పి.యస్ . పెట్టుకుని బయలు దేరాను . ఎండ ఎండ అని భయపడతారు కాని బెజవాడ వాళ్ళం ఈ ఎండ ఒక లెఖ్ఖా? మా అబ్బాయి మాత్రం ఆ ఎండ వేరు , ఈ ఎండ వేరు అని సన్ స్క్రీన్ రాయించి , నల్ల కళ్ళద్దాలు పెట్టించి పంపాడు.

రోడ్డు అటు ఇటు మలుపులు ఎక్కువ లేవు . తిన్నగా వెళ్ళాను . షాపు బాగుంది . లోపలకి అలాగే వెళ్ళి ' ఏమిటో సరిగ్గా కనిపించటం లేదు ' అని అనుకున్నాక వాళ్ళు నా కేసి చూసిన చూపుకి అర్ధం అయింది నేను అద్దాలు మార్చలేదని. అసలు అలవాటు లేక పోతే ఇదే ఇబ్బంది . మాములు అద్దాలు పెట్టుకుని చూసాను. ' కనపడుతోంది ! కళ్ళకేం కాలా!'

ఎక్కువ పుస్తకాలు లేవు కాని అన్ని రకాలు వున్నాయి . రెండు అంతస్ధులు . ఏ సెక్షన్ కి ఆ సెక్షన్ విడిగా వుంది . ప్రతి అరలోను స్టాఫ్ కొన్ని పుస్తకాలను పరిచయం చేస్తూ చేత్తో రాసిన స్లిప్లు వున్నాయి . 'స్టాఫ్ రికమెండేషన్ ' అని . అది బాగుంది. అలా అన్ని ముఖ్యమైన జోనర్సకి వున్నాయి . వెళ్ళాక కొనకుండా ఎట్లా? ఓ నాలుగు కొన్నాను. అందులో ఈ మథ్యే విక్టరీ సిటి చదివానేమో , అందులో ఒకటి రష్దీది . Essays.

తెలీకుండా ఒక గంట అయిపోయింది . ఆకలి మొదలయింది. పొద్దున్న తిన్న దోసెలు అరిగి పోయాయి . మళ్ళీ వెనక్కి బయలుదేరాను. ఆ( ఏముంది వచ్చిన తోవే కదా అని ఈ సారి జి. పి.యస్ పెట్టుకోలేదు . సగం దూరం బాగానే వచ్చాక అక్కడ రెండు రోడ్లు . ఇందులో ఏది? బుద్ధిగా ఫోన్ తీసి డైరక్షన్ పెట్టి , అది కూడా సరిగ్గా అర్ధం కాక తప్పు దోవలో రెండు అడుగులు వేయగానే ఫోను కుయ్యో అంది . అప్పుడు సరియైన తొవకి వచ్చి ఇల్లు చేరాను .

సాయంకాలం వాటర్ ఫ్రంట్ . మేముూ వస్తామన్నారు కొడుకు , కోడలు .

america kaburlu-2

 అమెరికా కబుర్లు -2

కిందటి సారి చూడనవి ఈ సారి చూడాలి అని నిర్ణయించుకుని వచ్చాను . దాని కంటే ముందు మనుష్యులను కలవాలని వచ్చాను .

మా అబ్బాయి ఇంటికి సూర్యడి వెలుతురు బాగా వస్తుంది . ఆ వెలుతురు , వేడి చూస్తే చలి అనిపించదు . వాతవరణం చల్లగా వున్నా సరే.

మధ్యాహ్నం భోజనాలయ్యాక దగ్గర్లోనే వున్న జూ కి వెళ్ళాం . జూ అంత తిరిగే ఓపిక లేదు కాని వీలైనంత నడుద్దామని బయలు దేరాము . దారిలో పూల మొక్కలు సుశీల గారి ఫొటోలను గుర్తు చేసాయి . జూ లో ఆ పెద్ద చెట్లు , ఆ తీయని వాసనలు మోసుకు వచ్చిన గాలి బాగుంది కాని జంతువులని అలాచూడడం బాధ అనిపించింది. ముఖ్యంగా పాండాల కళ్ళలో ఆ నిరాసక్తత బాధ కలిగించింది . మనిషి క్రూరత్వంకి అది పరాకాష్ఠ!

This photo is from a post.

View Post

---

Active

Prasuna Balantrapu

Sotporesdn410a9uhlmi0hut10A 9guau7gh11768869lr132pu0fi9c2a 

Shared with Your frien

Edit

All reactions:

6Jagadeswar